បុគ្គលសំខាន់របស់ប្រទេសជាសមាជិកអាស៊ាន ទាំង ១០

គ្រប់ចលនានៃដំណើរការអ្វីមួយ តែងមានប្រមុខក្រុមដែលជាមេគំនិតក្នុងការធ្វើដំណើរទៅកាន់គោលដៅដែលបានកំណត់ទុក។ ទោះបីជាចលនានោះជាចលនាតូចក្តីធំក្តី។ ចលនាក្នុងការដឹកនំាធ្វើនយោបាយទោះកុម្មុយនីស្ត ឬសេរីក្តី គឺសុទ្ធសឹងតែមានអ្នកនំាមុខដែលបរិបូរណ៍ទៅដោយគុណសម្បត្តិ ទំាងចំណេះដឹង និងទឹកចិត្តប្រាកដនិយម ក្នុងការពន្យល់ អំពីទស្សនវិស័យទៅកាន់កូនក្រុម រហូតដល់កូនក្រុមយល់ច្បាស់ពីមនោគម និងច្បាស់អំពីផ្លូវដែលពួកគេត្រូវដើរ។ “អ្នកដឹកនំាល្អ គឺជាអ្នកចេះធ្វើឱ្យអ្នកដទៃល្អដូចខ្លួនដែរ”។ គំនិតនេះ ចងបញ្ជាក់ និងលាតត្រដាងអំពី អត្តចរិត នៃអ្នកដឹកនាំល្អបែបណា មនុស្សដែលនៅក្នុងក្រុមនោះក៏មានអត្តចរិតបែបនោះដែរ។

ភាពជាអ្នកដឹកនាំ គឺជាយន្តការនៃការ​ធ្វើឱ្យ​​ទទួល​បានជោគជ័យតាមគោល​ដៅដែលបាន​កំណត់ តាមរយៈការប្រើ​ប្រាស់ធនធានប្រកបដោយ ប្រសិទ្ធភាព។

ឆន្ទៈ និងការតស៊ូ គឺជាកត្តាដែលមិនអាច​ខ្វះបានរបស់អ្នកដឹកនាំគ្រប់រូប។ មនុស្សជាច្រើនដឹងនូវអ្វីដែលខ្លួនត្រូវធ្វើ ប៉ុន្តែ មនុស្សតិចណាស់ដែលធ្វើនូវអ្វីដែល​ខ្លួនបានដឹង។ ដូច្នេះហើយ ទើបមនុស្សតិចណាស់ក្លាយជាអ្នកដឹកនាំ មានទ្រព្យសម្បត្តិ កិត្តិយសខ្ពស់ និងជាបុគ្គលសំខាន់ម្នាក់។

ទស្សនៈរបស់អ្នកដឹកនាំគឺ​ អ្វីៗដែលកើតឡើងសុទ្ធតែមានមូលហេតុរបស់វា​ មិនមែនដោយសារតែ​ព្រេងវាសនា ឬព្រហ្មលិខិតនោះទេ។

ការរៀនសូត្រគឺ​គ្មាន​ព្រំដែនទេសម្រាប់អ្នកដឹកនាំ។​ មនុស្សដែលទទួលបាន​ជោគ​ជ័យ​លឿន​ជាទី​បំផុតគឺ អនុវត្ត​ទ្រឹស្តី​ល្អៗ រៀន​តាម​មនុស្ស​​ដែល​​ធ្លាប់​​ទ​ទួល​​បាន​ជោគ​ជ័យ​ យ៉ាងណាមិញដើម្បីក្លាយជាសិស្សពូកែ​ គឺរៀនអនុវត្តតាមសិស្សដែលពូកែ និងមិនធ្វើ​តាម​អាកប្បកិរិយា​សិស្ស​ដែល​រៀន​ខ្សោយ ឬដើម្បី​ក្លាយ​ជា​អ្នកមាន ​គឺត្រូវធ្វើត្រាប់តាមអ្នកមាន និងមិនយកតម្រាប់តាមអ្នកក្រ។

សង្ឃឹមយ៉ាងមុតមាំថា កម្រងសៀវភៅដែលក្រុមយើងខ្ញុំបានចងក្រង​ និងរៀបរៀងនេះនឹងបានជាគំរូសម្រាប់អ្នកអានទុកជាមាគ៌ាបដិបត្តិតរៀងទៅ។ ហើយក្នុងនេះដែរ​ យើងខ្ញុំបានរៀបជាផ្នែកសំខាន់ៗគឺ​ ផ្នែកទី១បុគ្គលសំខាន់នៃបណ្ដាប្រទេសសមាជិកអាស៊ានទាំង​ ១០។ ផ្នែកទី២​ ជីវប្រវត្ដិ សង្ខេបរបស់មេដឹកនាំប្រទេសជាសមាជិកអាស៊ានទាំង ១០ និងឈ្វេងយល់អំពីស្ថានភាពទូទៅរបស់បណ្ដាប្រទេសសមាជិកអាស៊ានទាំង ១០។ ផ្នែកទី៣ សិក្សាឈ្វេងយល់ពីអាស៊ាន និងសមាហរណកម្ម។